Current Affairs April 25 | జాతీయం

April 28, 2023 / 02:54 PM IST

గ్లోబల్‌ బయోగ్యాస్‌ సదస్సు

కంప్రెస్డ్‌ బయోగ్యాస్‌ (సీబీజీ)పై గ్లోబల్‌ సదస్సును ఏప్రిల్‌, 17, 18 తేదీల్లో న్యూఢిల్లీలో నిర్వహించారు. దీన్ని పెట్రోలియం, నేచురల్‌ గ్యాస్‌ మంత్రిత్వ శాఖ ఆధ్వర్యంలో ఐఎఫ్‌జీఈ (ఇండియన్‌ ఫెడరేషన్‌ ఆఫ్‌ గ్రీన్‌ ఎనర్జీ)-సీబీజీ ప్రొడ్యూసర్స్‌ ఫోరం నిర్వహించింది. సీబీజీ పరిశ్రమ అభివృద్ధికి భారత ప్రభుత్వం తీసుకున్న కార్యక్రమాల గురించి పరిశ్రమలకు అవగాహన కల్పించడంతో పాటు విధాన సవరణలు, అవసరమైన ప్రాంతాలను గుర్తించడం ఈ సదస్సు లక్ష్యం. ‘టువర్డ్స్‌ ప్రోగ్రెసివ్‌ పాలసీ ఫ్రేమ్‌వర్క్‌ ఫర్‌ ఏ రోబస్ట్‌ సీబీజీ ఫౌండేషన్‌ అండ్‌ గ్రోత్‌’ అనే థీమ్‌తో ఈ సదస్సును నిర్వహించారు.

పీఎస్‌ఎల్‌వీ సీ55

ఆంధ్రప్రదేశ్‌, తిరుపతి జిల్లాలోని షార్‌ నుంచి ఏప్రిల్‌ 22న చేపట్టిన పీఎస్‌ఎల్‌వీ సీ55 రాకెట్‌ ప్రయోగం విజయవంతమైంది. సింగపూర్‌కు చెందిన 741 కిలోల బరువుగల టెలియోస్‌-2, 16 కిలోల ల్యూమ్‌లైట్‌-4 శాటిలైట్‌లను నిర్ణీత కక్ష్యలోకి ప్రవేశ పెట్టారు. టెలీయోస్‌-2లో సింథటిక్‌ అపెర్చర్‌ రాడార్‌ పేలోడ్‌ను ఉంచారు. ఇది భూ పరిశీలన శాటిలైట్‌. ల్యూమ్‌లైట్‌-4 సింగపూర్‌ ఇ-నావిగేషన్‌ సముద్ర భద్రతను పెంపొందించడం, ప్రపంచ షిప్పింగ్‌ కమ్యూనిటీకి ప్రయోజనం చేకూర్చుతుంది. పీఎస్‌ఎల్‌వీ సిరీస్‌లో ఇది 57వ రాకెట్‌.