అతిపురాతన వృక్షం ఏదో తెలుసా?
స్వీడన్లోని దలార్నా ప్రావిన్స్లోగల ఫలుఫ్జల్లెట్ పర్వతంపైన ఉన్న ఓల్డ్ టిజికో వృక్షం ప్రపంచంలోనే అతిపురాతన (క్లోనల్) వృక్షంగా గుర్తింపు పొందింది. దీని వయస్సు 9,958 ఏండ్లు. అయినా ఇది కేవలం 16 నుంచి 20 అడుగుల పొడవు మాత్రమే ఉంటుంది. కార్బన్ డేటింగ్ అనే ప్రక్రియ ద్వారా ఈ చెట్టు వయస్సును లెక్కించారు.
-ఫలుఫ్జల్లెట్ పర్వతం ఎప్పుడూ మంచుతో కప్పి ఉండటంవల్ల కొన్ని వేల ఏండ్లపాటు ఈ వృక్షం మోడుబారిన పొదలాగా కనిపించేది. 20వ శతాబ్దంలో వాతావరణంలో మార్పులు జరిగి మంచు కరగడంతో ఇది బయటపడింది. దీన్ని లీఫ్ కుల్మన్ అనే శాస్త్రవేత్త గుర్తించాడు. తన చనిపోయిన కుక్క టిజికో గుర్తుగా ఈ వృక్షానికి ఓల్డ్ టిజికో అని పేరుపెట్టాడు.
-ఓల్డ్ టిజికో వృక్షంలో ప్రస్తుతం కనిపిస్తున్న ప్రకాండ భాగం పురాతనమైనది కాదు. ఈ చెట్టు కాండం గరిష్టంగా 600 ఏండ్లు మాత్రమే సజీవంగా ఉంటుంది. అయితే వేరువ్యవస్థ మాత్రం ఎన్నేండ్లయినా చెక్కుచెదరదు. కాండం నశించగానే వేరు నుంచి కొత్త కాండం మొలకెత్తుతుంది.
-ఈ విధంగా ఓల్డ్ టిజికో వృక్షం కొన్ని వేల ఏండ్ల నుంచి నశించిన భాగాలను పునరుత్పత్తి చేసుకుంటూ తన మనుగడ కొనసాగిస్తున్నది.
