Alliances-Meetings | కూటములు-సమావేశాలు

బిమ్స్‌టెక్

-బంగాళాఖాత తీర దేశాలు సాంకేతిక, ఆర్థిక రంగాల్లో పరస్పరం సహకరించుకోవడానికి బే ఆఫ్ బెంగాల్ ఇన్నోవేటివ్ ఫర్ మల్టీ సెక్టోరల్ టెక్నికల్ అండ్ ఎకనమిక్ కోఆపరేషన్ (బంగాళాఖాత తీర దేశాల బహుళార్థ సాంకేతిక, ఆర్థిక సహకార సంస్థ-బిమ్స్‌టెక్) 1997, జూన్ 6న ఏర్పడింది.
-ఇందులో భారత్, బంగ్లాదేశ్, బర్మా (మయన్మార్), భూటాన్, శ్రీలంక, థాయ్‌లాండ్, నేపాల్‌లు సభ్యదేశాలు. ఈ ప్రాంతీయ కూటమిలో మొదట బంగ్లాదేశ్, ఇండియా, శ్రీలంక, థాయ్‌లాండ్‌లు (బీఐఎస్‌టీ-ఈసీ) సభ్యులుగా ఉన్నాయి.

-1997, డిసెంబర్ 22న మయన్మార్ చేరడంతో బీఐఎంఎస్‌టీ-ఈసీగా, 2014లో నేపాల్, భూటాన్‌లు శాశ్వత సభ్యత్వం తీసుకోవడంతో అది బిమ్స్‌టెక్‌గా మారింది.
-ఈ కూటమి మొదటి సమావేశం 2004, జూలై 31న థాయ్‌లాండ్‌లోని బ్యాంకాక్‌లో, రెండో సమావేశం న్యూఢిల్లీలో 2008, నవంబర్ 13న జరిగింది.
-మూడో సమావేశం మయన్మార్‌లోని నేపిడాలో 2014, మార్చి 4న జరుగగా, 2017లో జరుగనున్న నాలుగో సమావేశానికి నేపాల్ రాజధాని కఠ్మాండు ఆతిథ్యం ఇవ్వనుంది.

ఒపెక్

-ప్రధాన కార్యాలయం ఆస్ట్రియాలోని వియన్నాలో ఉంది.
-ఇది 1960, సెప్టెంబర్‌లో ఇరాక్‌లోని బాగ్దాద్‌లో ఏర్పడింది.
-సభ్యదేశాలు: 13 (ఇరాన్, ఇరాక్, కువైట్, సౌదీఅరేబియా, వెనిజులా (1960, సెప్టెంబర్‌లో సభ్యత్వం తీసుకున్నాయి), ఖతార్ (1961), లిబియా, ఇండోనేషియా (1962), యునైటెడ్ అరబ్ ఎమిరేట్స్ (యూఏఈ-1967), అల్జీరియా (1969), నైజీరియా (1971), ఈక్వెడార్ (1973), గబాన్ (1975), అంగోలా (2007)).

-1992లో ఈక్వెడార్‌ను ఒపెక్ నుంచి తొలగించగా, 2007లో మళ్లీ సభ్యత్వం పొందింది.
-ఇండోనేషియాను 2009, జనవరిలో కూటమి నుంచి తొలగించగా, 2016, నవంబర్‌లో తిరిగి చేరింది.
-గబాన్‌ను 1995లో జనవరిలో కూటమి నుంచి బహిష్కరించారు.
-మొదటి సమావేశం 1960, సెప్టెంబర్ 10 నుంచి 14 వరకు ఇరాక్‌లోని బాగ్దాద్‌లో జరిగింది.
-170వ సమావేశం 2016, సెప్టెంబర్ 28న అల్జీరియాలోని అల్జీర్స్‌లో, 171వ సమావేశం ఆస్ట్రియాలోని మియన్నాలో 2016, నవంబర్ 30న జరిగింది.
-172వ సమావేశం 2017, మే 22న ఆస్ట్రియా రాజధాని వియన్నాలో జరుగనుంది.

ఏషియన్ డెవలప్‌మెంట్ బ్యాంకు

-ఆసియా ప్రాంతాల్లో సామాజిక, ఆర్థిక అభివృద్ధిని సాధించడమే ప్రధాన లక్ష్యంగా 1966, డిసెంబర్ 19న ఆసియా అభివృద్ధి బ్యాంకును ఏర్పాటు చేశారు. దీని ప్రధాన కార్యాలయం ఫిలిప్పైన్స్‌లోని మనీలాలో ఉంది.
-ప్రపంచ బ్యాంకు విధివిధానాలను పోలి ఉండే ఈ బ్యాంకుకు ప్రస్తుతం అధ్యక్షుడిగా జపాన్‌కు చెందిన తకెహికో నకావో ఉన్నారు (2013 నుంచి ఆయన కొనసాగుతున్నారు). బ్యాంకు మొదటి అధ్యక్షుడు తకేషీ వతనబె (1966-72)
-ఇందులో మొత్తం 67 దేశాలు (ఆసియా పసిఫిక్ దేశాలు 48, ఇతర ప్రాతాలకు చెందిన దేశాలు 19) సభ్యత్వం కలిగి ఉన్నాయి. అయితే మొదట 31 దేశాలు మాత్రమే సభ్యులుగా చేరాయి.

-ఈ బ్యాంకులో చివరగా ఐర్లాండ్ 2006లో సభ్యత్వం తీసుకున్నది.
-ఇది ప్రతి ఏడాది సమావేశమవుతుంది.
-1966, నవంబర్ 24 నుంచి 26 వరకు ప్రారంభ సమావేశాలు జరుగగా, మొదటి సమావేశం మనీలాలోని మనీలా హిల్టన్‌లో ఏప్రిల్ 4-6 వరకు జరిగాయి.
-రెండో సమావేశాలు 1969, ఏప్రిల్ 10 – 12 వరకు ఆస్ట్రేలియా రాజధాని సిడ్నీలో, మూడో సమావేశం కొరియా రాజధాని సియోల్‌లో 1970, ఏప్రిల్ 9 – 11 వరకు జరిగాయి.
-49వ వార్షిక సమావేశం 2016, మే 3-5 వరకు జర్మనీలోని ఫ్రాంక్‌ఫర్ట్‌లో జరిగాయి.

-50వ వార్షిక సమావేశాలను 2017, మే 4 నుంచి 7 వరకు జపాన్‌లోని యొకొహామాలో నిర్వహించారు.
-ఏడీబీ సమావేశాలకు భారత్ ఇప్పటివరకు మూడు సార్లు ఆతిథ్యమిచ్చింది.
-మొదటి సమావేశం 1990, మే 2-4 వరకు (23వ సమావేశం) న్యూఢిల్లీలో, రెండో సారి 2006, మే 4-6 వరకు హైదరాబాద్‌లో (39వ సమావేశం), మూడోసారి 2013, మే 4, 5 తేదీల్లో (46వ సమావేశం) న్యూఢిల్లీలో జరిగాయి.

నామ్ (అలీనోద్యమం)

-అమెరికా, సోవియట్ యూనియన్ దేశాలకు చెందిన కూటముల్లో చేరకుండా తటస్థంగా ఉన్న దేశాలన్నీ కలిసి 1961లో బెల్‌గ్రేడ్‌లో అలీనోద్యమ కూటమి (నాన్ అలైన్‌డ్ మూవ్‌మెంట్)గా ఏర్పడ్డాయి.
-దీని ప్రధాన కార్యాలయం ఇండోనేషియాలోని జకార్తాలో ఉంది.
-కూటమిలోని సభ్యదేశాల స్వాతంత్య్రం, సార్వభౌమత్వం, సమగ్రత, భద్రతలను పరిరక్షించడమే దీని ప్రధాన ఉద్దేశం.
-అలీనోద్యమ రూపకర్తలు భారతదేశ తొలి ప్రధాని జవహర్‌లాల్ నెహ్రూ, ఇండోనేషియా తొలి అధ్యక్షుడు సుకర్నో, ఈజిప్టు రెండో అధ్యక్షడు గామెల్ అబ్దుల్ నాసర్, ఘనా తొలి అధ్యక్షుడు క్వామేక్రుమా, యుగోస్లేవియా అధ్యక్షుడు జోసిప్ టిటో.
-ఇందులో మొత్తం 120 దేశాలకు సభ్యత్వం ఉండగా, 17 దేశాలు పరిశీలక హోదా కలిగి ఉన్నాయి.
-కూటమి ప్రస్తుత సెక్రటరీ జనరల్- నికోలస్ మదూరో
-ఇది ప్రతి మూడేండ్లకు ఒకసారి సమావేశమవుతుంది. ఇలా ఇప్పటివరకు 17 సమావేశాలు జరిగాయి.

-ఈ కూటమి మొదటి సమావేశం 1961లో బెల్‌గ్రేడ్‌లో జరిగింది.
-రెండో సమావేశం యునైటెడ్ అరబ్ రిపబ్లిక్‌లోని కైరోలో 1964, అక్టోబర్ 5-10వ జరిగింది.
-2012, ఆగస్టు 26-31 వరకు ఇరాన్‌లోని టెహ్రాన్‌లో 16వ సమావేశం జరిగింది.
-17వ సమావేశం 2016, సెప్టెంబర్ 13-18 వరకు వెనిజులాలోని మార్గరెటా ద్వీపంలో జరిగింది.
-ఈ సమావేశాలకు భారత్ ఒకసారి ఆతిథ్యమిచ్చింది. 1983లో న్యూఢిల్లీలో (7వ సమావేశం) జరిగాయి.