6,61,196 మందికి కానిస్టేబుల్‌ ప్రిలిమ్స్
కానిస్టేబుల్‌ ప్రాథమిక రాత పరీక్ష (ప్రిలిమ్స్)కు తెలంగాణ పోలీస్ నియామక మండలి (టీఎస్ఎల్పీఆర్బీ) విస్తృత ఏర్పాట్లు చేస్తున్నది. పోలీస్ శాఖ‌లో 15,644, రవాణాశాఖలో 63, ఎక్సైజ్‌శాఖలో 614 కానిస్టేబుల్‌ పోస్టులకు ఈ నెల 28న జరిగే ఈ పరీక్షకు మొత్తం 6,61,196 మంది అభ్యర్థులు (అన్ని పోస్టులకు కలిపి) హాజరుకానున్నారు. వీరి కోసం హైదరాబాద్‌తోపాటు రాష్ట్రవ్యాప్తంగా ఇతర పట్టణాల్లో మొత్తం 1,601 పరీక్ష కేంద్రాలు ఏర్పాటు చేస్తున్నారు. ప్రతి అభ్యర్థికి పరీక్ష కేంద్రంలో బయోమెట్రిక్‌ పద్ధతిలో హాజరు నమోదు చేయడంతోపాటు పరీక్ష నిర్వహణలో సాధ్యమైనంత మేరకు సాంకేతికతను వినియోగించేందుకు కసరత్తు చేస్తున్నది. పరీక్షలో ఎలాంటి అవకతవకలకు తావులేకుండా అన్ని కేంద్రాల్లో సీసీటీవీ కెమెరాలు ఏర్పాటు చేయనున్నట్టు సమాచారం. అభ్యర్థులు తమ హాల్‌టికెట్లను ‘www.tslprb.in’ వెబ్‌సైట్‌ నుంచి ఈ నెల 26 అర్ధరాత్రి 12 గంటల్లోగా డౌన్‌లోడ్‌ చేసుకోవాలని బోర్డు తెలిపింది. హాల్‌టికెట్ల డౌన్‌లోడింగ్‌లో ఇబ్బందులుంటే support@tslprb.in ఈ-మెయిల్‌ను లేదా 9393711110, 9391005006 ఫోన్‌ నంబర్లను సంప్రదించాలని సూచించింది.
