SSC CHSL Preparation 2023 | ఉమ్మడిగా చదివితే.. ఉద్యోగం మీదే!

ఎస్‌ఎస్‌సీ-సీహెచ్‌ఎస్‌ఎల్‌ 2023 ప్రిపరేషన్‌ ప్లాన్‌

ఎస్‌ఎస్‌సీ సీహెచ్‌ఎస్‌ఎల్‌ 2023- స్టాఫ్‌ సెలక్షన్‌ కమిషన్‌ కంబైన్డ్‌ హయ్యర్‌ సెకండరీ లెవల్‌ ఎగ్జామినేషన్‌-2023 ప్రకటన వెలువడింది. మొత్తం 1600 పోస్టులకు 4 విభాగాల్లో ఖాళీలను భర్తీ చేయనున్నారు. అవి..
1. లోయర్‌ డివిజన్‌ క్లర్క్‌
2. జూనియర్‌ సెక్రటేరియట్‌ అసిస్టెంట్‌
3. డేటా ఎంట్రీ ఆపరేటర్‌
4. డేటా ఎంట్రీ ఆపరేటర్‌ గ్రేడ్‌-ఎ

• ఇంటర్‌ అర్హతతో వివిధ కేంద్ర ప్రభుత్వ సంస్థలు, మంత్రిత్వ శాఖల్లో ఈ పోస్టులను ఎస్‌ఎస్‌సీ ద్వారా భర్తీ చేస్తారు. తాజాగా విడుదలైన ఈ నోటిఫికేషన్‌లో 1600 ఖాళీలను పేర్కొన్నారు. అయితే ఈ సంఖ్య 5000 వరకు పెరిగే అవకాశాలు ఉన్నాయి. అభ్యర్థులు ssc.nic.in వెబ్‌సైట్‌ను సందర్శించడం ద్వారా తాజా అప్‌డేట్స్‌ తెలుసుకోవచ్చు.
• ఎస్‌ఎస్‌సీ సీహెచ్‌ఎస్‌ఎల్‌-2023 నూతన సిలబస్‌ ప్రకారం నిర్వహించబోయే పరీక్ష కాబట్టి సిలబస్‌పై విశ్లేషణ, పరీక్ష విధానం, ప్రిపరేషన్‌ ప్లాన్‌, బుక్స్‌పై పూర్తిగా అవగాహన పెంచుకుందాం..
  పరీక్ష విధానం
• ఇందులో టైర్‌-1, టైర్‌-2 కంప్యూటర్‌ బేస్డ్‌ రెండంచెల పరీక్ష ఉంటుంది. రెండు పరీక్షలు వేర్వేరు సెషన్స్‌లో నిర్వహిస్తారు. ముందుగా టైర్‌-1 పరీక్ష ఆగస్టు 2023లో ఉంటుంది. ఇందులో ఉత్తీర్ణత సాధించిన వారిని టైర్‌-2కు అనుమతిస్తారు. ఇక టైర్‌-2 పరీక్ష నవంబర్‌/డిసెంబర్‌లో ఉంటుంది. టైర్‌-1, టైర్‌-2 పరీక్షలు తెలుగులో రాసుకోవచ్చు. తెలుగు మీడియం విద్యార్థులకు ఇది చక్కటి అవకాశం. తాజాగా తెలంగాణలో జరిగిన పోలీస్‌ కానిస్టేబుల్‌, ఎస్సై అభ్యర్థులకు ఇది ఊరటనిచ్చే అంశం.
  టైర్‌-1
• ఇందులో నాలుగు విభాగాలు ఉంటాయి. ఆబ్జెక్టివ్‌ తరహా ప్రశ్నపత్రం ఇంగ్లిష్‌, తెలుగు భాషల్లో ఉంటుంది. ఇది కేవలం అర్హత పరీక్ష మాత్రమే.
• టైర్‌-1లో ప్రతి ప్రశ్నకు 2 మార్కులు కేటాయించారు. ప్రతి తప్పు సమాధానానికి అర మార్కు కోత విధిస్తారు.
  టైర్‌-2
• ఇందులో మొత్తం మూడు సెక్షన్‌లు ఉంటాయి. ఒక్కో సెక్షన్‌లో రెండు మాడ్యూల్స్‌ ఉంటాయి. అంటే 2 సబ్జెక్టులు/విభాగాలు ఉంటాయి.
• టైర్‌-2 పరీక్షలో కూడా టైర్‌-1లో ఉన్న విభాగాలే ఉంటాయి. కంప్యూటర్స్‌, స్కిల్‌ టెస్ట్‌/టైపింగ్‌లో కలిపి మొత్తం 6 విభాగాలుంటాయి. ఇవి ఆబ్జెక్టివ్‌ తరహాలో ఉంటాయి. ఇంగ్లిష్‌ లేదా తెలుగులో కూడా పరీక్ష రాసుకునే వెసులుబాటు కల్పించారు.
• నెగెటివ్‌ మార్కింగ్‌ ఉంది. ప్రతి తప్పు సమాధానానికి 1 మార్కు కోత విధిస్తారు.
• కంప్యూటర్‌ బేస్డ్‌ టెస్ట్‌- ఆన్‌లైన్‌ తరహా ప్రశ్నపత్రం ఉంటుంది.
• టైర్‌-2లో అన్ని విభాగాలు, సెక్షన్స్‌కు ఒకేరోజు పరీక్ష నిర్వహిస్తారు.
• డీఈవో పోస్టుకు స్కిల్‌ టెస్ట్‌ తప్పనిసరి.
• కంప్యూటర్‌ నాలెడ్జ్‌లో 45 మార్కులు కేటాయించారు. కాని ఇది కేవలం అర్హత పరీక్ష మాత్రమే. ఇందులో సాధించిన మార్కులను తుది జాబితాలో పరిగణనలోకి తీసుకోరు.
• స్కిల్‌ టెస్ట్‌/టైపింగ్‌ టెస్ట్‌లు కంప్యూటర్‌పై నిర్వహిస్తారు.

విభాగాల వారీగా ప్రిపరేషన్‌ ప్లాన్‌
1. ఇంగ్లిష్‌ లాంగ్వేజ్‌

• ఈ విభాగం టైర్‌-1, టైర్‌-2లో ఉంటుంది. టైర్‌-1లో ఇంగ్లిష్‌ లాంగ్వేజ్‌, కాంప్రహెన్షన్‌తో కూడిన సిలబస్‌ ఉంటుంది. ఇందులో స్పాట్‌ ది ఎర్రర్‌, ఫిల్‌ ఇన్‌ ద బ్లాంక్స్‌, సినానిమ్స్‌/ఆంటోనిమ్స్‌, స్పెల్లింగ్స్‌, ఇడియమ్స్‌, ప్రత్యామ్నాయ పదాలు, వాక్యాల అభివృద్ధి, యాక్టివ్‌ వాయిస్‌, పాసివ్‌ వాయిస్‌, సెంటెన్స్‌ అరెంజ్‌మెంట్స్‌, సెంటెన్స్‌ కరెక్షన్స్‌, ప్రిపోజిషన్స్‌, ఆర్టికల్స్‌, కోడ్‌ టెస్ట్‌ ఉంటాయి.
• టైర్‌-2లో కాంప్రహెన్షన్‌ ప్యాసేజ్‌, వొకాబులరీ, గ్రామర్‌తో పాటు పైన పేర్కొన్న అన్ని టాపిక్స్‌ వస్తాయి. ఈ పార్ట్‌లో అధిక శాతం ప్యాసేజ్‌లు ఉంటాయి. 5-6 ప్యాసేజ్‌లకు 1-2 ప్రశ్నలు వచ్చే అవకాశం ఉంది.
  జనరల్‌ ఇంటెలిజెన్స్‌, రీజనింగ్‌
• ఈ విభాగం నుంచి వెర్బల్‌-నాన్‌ వెర్బల్‌ తరహా ప్రశ్నలు, సింబాలిక్‌ అనాలజీ, నంబర్‌ అనాలజీ, ఫిగరల్‌ అనాలజీ, వెన్‌ డయాగ్రమ్స్‌, మిర్రర్‌-వాటర్‌ ఇమేజెస్‌, ఫోల్డింగ్‌ ఫిగర్స్‌, నంబర్‌-లెటర్‌ సిరీస్‌, వర్డ్‌ బిల్డింగ్‌, ఎమోషనల్‌ ఇంటెలిజెన్స్‌, సోషియల్‌ ఇంటెలిజెన్స్‌, కోడింగ్‌-డికోడింగ్‌, బ్లడ్‌ రిలేషన్స్‌, సిలాజిసమ్స్‌, ర్యాంకింగ్‌, డైరెక్షన్స్‌, క్యాలెండర్‌-క్లాక్స్‌ వంటి చాప్టర్స్‌ ముఖ్యమైనవి.
• టైర్‌-3 కోసం పై అంశాలతో పాటు సీటింగ్‌ అరెంజ్‌మెంట్స్‌, పజిల్స్‌, స్టేట్‌మెంట్‌ ఆధారిత ప్రశ్నలు చదవాలి.
• ఎస్‌ఎస్‌సీ సీహెచ్‌ఎస్‌ఎల్‌లో రీజనింగ్‌ విభాగం ప్రత్యేకమైంది. 60 శాతం తేలికపాటి బేసిక్స్‌ ప్రశ్నలే వస్తాయి. ఇవి స్కోరింగ్‌కు ఉపయోగపడుతాయి. ఇందులో మంచి మార్కులు పొందాలంటే పూర్వ ప్రశ్నపత్రాలు చదవాలి, మోడల్‌ ప్రశ్నపత్రాలను ప్రాక్టీస్‌ చేయాలి.
• టైర్‌-1, 2లకు విడివిడిగా ప్రిపేర్‌ కాకూడదు. కామన్‌ టాపిక్స్‌ను ఎంచుకొని ఉమ్మడిగా ప్రిపేర్‌ కావాలి.
• ఇందుకు ఏదేని కోచింగ్‌ మెటీరియల్‌ను అనుసరిస్తే పూర్తి అవగాహన ఏర్పడుతుంది.
  కాంపిటేటివ్‌ ఆప్టిట్యూడ్‌, మ్యాథమెటికల్‌ ఎబిలిటీస్‌
• టైర్‌-1లో క్వాంట్స్‌, టైర్‌-2లో మ్యాథ్స్‌ విభాగం నుంచి ప్రశ్నలు వస్తాయి. ఇవి సాధారణంగా అర్థమెటిక్‌, ప్యూర్‌ మ్యాథ్స్‌తో కూడిన విభాగం. దీనిలో నంబర్‌ సిరీస్‌ మోడల్స్‌, బోడ్‌మాస్‌-సింప్లికేషన్స్‌, క్వాడ్రాటిక్‌-ఈక్వేషన్స్‌, డాటా ఇంటర్‌ప్రిటేషన్స్‌, డాటా సఫిషియన్సీ, రేషియో-ప్రిపోజిషన్స్‌, పర్సంటేజెస్‌, స్కేర్‌ రూట్స్‌, యావరేజెస్‌, సింపుల్‌-కాంపౌండ్‌ ఇంట్రస్ట్‌, లాభ నష్టాలు, టైం అండ్‌ వర్క్‌ వంటివి 15 ప్రశ్నలు వస్తాయి.
• ఆల్జీబ్రా, క్షేత్రగణితం, త్రికోణమితి, బీజగణితం వంటి అంశాలపై 10 ప్రశ్నలు వచ్చే అవకాశం ఉంది.
• టైర్‌-2 కోసం అర్థమెటిక్‌ అంశాలతో పాటు స్టాటిస్టిక్స్‌, ప్రాబబిలిటీ- టేబుల్స్‌, గ్రాఫ్స్‌, హిస్టోగ్రామ్‌, బార్‌ డాయాగ్రమ్‌, పైచార్ట్‌, మీన్‌, మీడియన్‌- మోడ్‌ వంటివి బాగా ప్రాక్టీస్‌ చేయాలి.
• టైర్‌-1లో 25 ప్రశ్నలు, టైర్‌-2లో 30 ప్రశ్నలు ఈ విభాగం నుంచి వస్తాయి. కాబట్టి పైన పేర్కొన్న అంశాలపై ఎక్కువ దృష్టి పెట్టి చదవాలి.
  జనరల్‌ అవేర్‌నెస్‌
• ఈ విభాగం నుంచి టైర్‌-1లో 25 ప్రశ్నలు, టైర్‌-2లో 20 ప్రశ్నలు వస్తాయి. జనరల్‌ నాలెడ్జ్‌, కరెంట్‌ అఫైర్స్‌, జనరల్‌ స్టడీస్‌ నుంచి ప్రశ్నలు వస్తాయి.
• ఇందులో చరిత్ర (పూర్వ, మధ్య, ఆధునిక యుగాలు), భారత రాజ్యాంగం (మూలాలు, లక్షణాలు, ప్రాథమిక హక్కులు, విధులు, ఆదేశిక సూత్రాలు), రాష్ట్రపతి-గవర్నర్లు, ప్రధాని-ముఖ్యమంత్రి, సుప్రీం కోర్టు-హై కోర్టు, రాజ్యాంగ బద్ధ సంస్థలు, సవరణలు వంటివి చదవాలి. ఇండియా-వరల్డ్‌ జాగ్రఫీ నుంచి భారతదేశ నైసర్గిక స్వరూపం, నదులు-డ్యామ్‌లు, దీవులు, నేలలు, వాతావరణం, పర్వతాలు, పచ్చిక బయళ్లు చదవాలి.
• భారత ఆర్థిక వ్యవస్థ నుంచి బ్యాంకింగ్‌ రంగం, ఆర్‌బీఐ మానిటరీ పాలసీ, బ్యాంకుల అనుసంధానాలు, 15వ ఆర్థిక సంఘం, బడ్జెట్‌, నీతి ఆయోగ్‌, జీఎస్టీ, ఆర్థిక మంత్రిత్వ శాఖ జారీ చేసిన బులెటెన్లు, కరెన్సీ – ఎక్సేంజ్‌, వాణిజ్యం, ప్రపంచ బ్యాంక్‌, ఐఎంఎఫ్‌ వంటి అంశాలపై అవగాహన పెంచుకోవాలి.
• కరెంట్‌ అఫైర్స్‌లో రాష్ర్టాల ఎన్నికలు, నూతన సీఎంలు, గవర్నర్ల నియామకం, క్రీడలు, అవార్డులు, పుస్తకాలు-రచయితలు, ముఖ్యమైన తేదీలు, జాతీయ-అంతర్జాతీయ అంశాలు చదవాలి. ఇందుకు గత ఆరు నెలల మాస పత్రికలను చదవాలి.
• ఈ విభాగంలో మంచి మార్కులు సాధించాలంటే సొంత నోట్స్‌ ప్రిపేర్‌ చేసుకోవాల్సిందే. వార్తాపత్రికలు, 6 నెలల మ్యాగజీన్స్‌ వంటివి తప్పకుండా ఫాలో కావాలి. నిత్యం జనరల్‌ స్టడీస్‌ ప్రశ్నలు సాల్వ్‌ చేస్తే ఫలితం ఉంటుంది.
  కంప్యూటర్‌ నాలెడ్జ్‌
• ఇది టైర్‌-2లో మాత్రమే వచ్చే విభాగం. 15 ప్రశ్నలకు 45 మార్కులు కేటాయించారు. ఇందులో కంప్యూటర్‌ బేసిక్స్‌, ఇన్‌పుట్‌, అవుట్‌పుట్‌, కంప్యూటర్‌ మెమరీ, కీ బోర్డు షార్ట్‌కట్‌లు, సాఫ్ట్‌వేర్‌లు, ఎంఎస్‌ ఆఫీస్‌, ఇంటర్నెట్‌, ఇ-బ్యాంకింగ్‌, ఇ-గవర్నెన్స్‌, సైబర్‌ సెక్యూరిటీ, వైరస్‌లు, స్పామ్‌లు, ఆర్టిఫిషియల్‌ ఇంటెలిజెన్స్‌, బ్లాక్‌చైన్‌ మేనేజ్‌మెంట్‌ వంటి అంశాలు కీలకం. ఇందులో మంచి మార్కులు సాధించడానికి ఏదైనా కంప్యూటర్‌ నాలెడ్జ్‌ మెటీరియల్‌, ప్రశ్నోత్తరాలు బాగా ప్రాక్టీస్‌ చేయాలి.
  డేటా ఎంట్రీ స్పీడ్‌ టెస్ట్‌
• ఇవి కంప్యూటర్‌పై టైపింగ్‌ టెస్ట్‌. 15 నిమిషాల్లో 2000 పదాలు టైపింగ్‌ చేయాలి. ఇందులో తప్పులు, అనువాదం, ప్రత్యామ్నాయ పదాలు, అదనపు పదాలు, పునరావృత పదాలు వంటి వాటిపై అవగాహన పొందడం వల్ల ఫలితం ఉంటుంది.

ఎస్‌ఎస్‌-సీహెచ్‌ఎస్‌ఎల్‌-2023 వివరాలు

• మొత్తం పోస్టులు: 1600 (పెరిగే అవకాశం ఉంది)
• చివరితేదీ: జూన్‌ 8
• అర్హతలు: ఇంటర్‌ ఉత్తీర్ణత
• వయస్సు: 18-27 మధ్య ఉండాలి (రిజర్వేషన్‌ కేటగిరీలకు మినహాయింపు ఉంటుంది)
• ఫీజు: రూ.100 (ఓసీ, బీసీ), ఎస్సీ, ఎస్టీలకు ఫీజు లేదు.
• పరీక్ష తేదీలు: టైర్‌-1 ఆగస్ట్‌లో, టైర్‌-2 నవంబర్‌-డిసెంబర్‌లో
• వెబ్‌సైట్‌: www.ssc.nic.in

 

మధు కిరణ్‌
డైరెక్టర్‌
ఫోకస్‌ అకాడమీ
హైదరాబాద్‌
9030496929