Current Affairs | తెలంగాణ
కథల పోటీలు
జాతీయ కథల పోటీలు-2022 అవార్డుల ప్రదానోత్సవం జూలై 9న తెలుగు యూనివర్సిటీలో నిర్వహించారు. ముల్కనూరు ప్రజాగ్రంథాలయ సాహిత్యపీఠం, నమస్తే తెలంగాణ దినపత్రిక ఏటా ఈ జాతీయ కథల పోటీలను నిర్వహిస్తుంది. దీనిలో మొదటి బహుమతి (రూ.50 వేలు) ఇబ్లిస్‌ కథా రచయిత హుమాయున్‌ సంఘీర్‌కు లభించింది. ద్వితీయ బహుమతి (రూ.25 వేలు) కిరణ్‌ విభావరి (అడవిపువ్వు), మద్దెర్ల రమేష్‌ (ఇసప్పురుగు), తృతీయ బహుమతి (రూ.10 వేలు) ధర్మశాంతి ప్రభాకర్‌ రావు (వలస కవులు), స్ఫూర్తి కందివనం (ముసురు), సుగుణ రావు (ఏలి ఏలి లాబా సబక్తాని) అందుకున్నారు. ముల్కనూరు ప్రజా గ్రంథాలయ సాహిత్యపీఠం, డబ్ల్యూఎస్‌వో సంస్థల ఆధ్వర్యంలో దివంగత కవి అలిశెట్టి ప్రభాకర్‌కు ‘నవ కవితాభిమన్యు’ బిరుదును ప్రకటించారు. మెమెంటోను, రూ.లక్ష రివార్డు అలిశెట్టి భార్యకు అందజేశారు.
స్వచ్ఛ సర్వేక్షణ్‌ గ్రామీణ్‌
స్వచ్ఛ సర్వేక్షణ్‌ గ్రామీణ్‌లో జూన్‌ నెలకు సంబంధించి ఎంపికయిన గ్రామాలను కేంద్రం జూలై 14న ప్రకటించింది. హై అచీవర్స్‌ కేటగిరీలో అలీరాజ్‌పూర్‌ (మధ్యప్రదేశ్‌) మొదటి స్థానంలో నిలువగా.. తరువాత వరుసగా రాష్ట్రంలోని జనగామ 2, కామారెడ్డి 3, ఖమ్మం 4, మహబూబాబాద్‌ 5, మంచిర్యాల 6, మేడ్చల్‌ మల్కాజిగిరి 7, ములుగు 8, నిర్మల్‌ 9, సంగారెడ్డి 10, వికారాబాద్‌ 11, యాదాద్రి భువనగిరి 12వ స్థానాల్లో నిలిచాయి. అచీవర్స్‌ కేటగిరీలో గ్యాల్‌షింగ్‌ (సిక్కిం) మొదటి స్థానంలో ఉండగా.. తరువాత వరుసగా రాష్ట్రంలోని హనుమకొండ 2, కుమ్రంభీం ఆసిఫాబాద్‌ 3, మెదక్‌ 4, నిజామాబాద్‌ 5, సూర్యాపేట 6, వరంగల్‌ 7, నాగర్‌కర్నూల్‌ 8, ఆదిలాబాద్‌ 9వ స్థానాల్లో ఉన్నాయి.
