వైవిధ్యమైన కోర్సులివి..
రొటీన్ కోర్సులకు భిన్నంగా ఏదైనా చేయాలి.. మెదడుకు పదునుపెట్టి సృజనాత్మకతను పెంచుకోవాలి.. అభిరుచి, ఆసక్తికి అనుగుణంగా కొత్తగా ఏదో చేయాలి.. నలుగురిలో ఒకడిగా కాకుండా ప్రత్యేకంగా నిలవాలి.. వాటికి తగ్గట్లు మంచి జీతభత్యాలు పొందాలి అనుకునేవారి కోసమే ఈ వైవిధ్యమైన కోర్సులు..
వీడియో ఎడిటింగ్
-రికార్డ్ చేసిన వీడియోలను ఎడిటింగ్ చేసేవారిని వీడియో ఎడిటర్లు అంటారు. అంటే వీడియోలను కాన్సెప్ట్‌కు అనుగుణంగా అవసర దృశ్యాలను తీసుకుని, అనవసరమైనదానిని కట్‌చేసి, ఆకర్షణీయంగా తీర్చిదిద్దే కళను వీడియో ఎడిటింగ్ అంటారు. పెండ్లి అయినా ఇతర ఏ ఫంక్షన్ అయినా వీడియోలు తీస్తున్నారు. వీటిలో అవసరమైనవి తీసుకుని ఆకట్టుకునేటట్టు తీర్చిదిద్దుతారు.
-ఈ వీడియో ఎడిట్‌ను వివిధ సాఫ్ట్‌వేర్‌లలో చేస్తున్నారు. అవే అవిడ్, ఎఫ్‌సీపీ. ఈ వీడియో ఎడిటింగ్‌లో లీనియర్, నాన్ లీనియర్, ఆఫ్‌లైన్, ఆన్‌లైన్, విజన్ మిక్సింగ్ అని వివిధ రకాలుగా ఉంటాయి.
-టెన్త్, ఇంటర్ చేసినవారు కూడా ఈ కోర్సును నేర్చుకోవచ్చు. ఈ కోర్సు చేసినవారికి ఫొటోస్టూడియోలు, టీవీ చానళ్లు, సినిమాల్లో ఉపాధి లభిస్తుంది.
కోర్సులు
-ఎంఎఫ్‌ఏ ఇన్ మీడియా డిజైన్
-బీఎస్ ఇన్ డిజిటల్ సినిమాటోగ్రఫీ
-మాస్టర్ ఆఫ్ ఆర్ట్స్ ఇన్ ఫిల్మ్ అండ్ టీవీ
సంస్థలు
-ఫిల్మ్ అండ్ టెలివిజన్ ఇన్‌స్టిట్యూట్ ఆఫ్ ఇండియా (పుణె)
-సత్యజిత్ రే ఫిల్మ్ అండ్ టెలివిజన్ ఇన్‌స్టిట్యూట్ (కోల్‌కతా)
-విజిలింగ్ ఉడ్స్ ఇంటర్నేషనల్ (ముంబై)
-సెంటర్ ఫర్ రిసెర్చ్ ఇన్ ఆర్ట్ ఆఫ్ ఫిల్మ్ అండ్ టెలివిజన్ (ఢిల్లీ)
-ఏషియన్ అకాడమీ ఆఫ్ ఫిల్మ్ అండ్ టెలివిజన్ (నోయిడా)
-ఇవేకాకుండా హైదరాబాద్‌లో చాలా ప్రైవేట్ సంస్థలు, సినీ స్టూడియోలు ఈ కోర్సును అందిస్తున్నాయి.
స్పా మేనేజ్‌మెంట్
-మనిషి అభివృద్ధి చెందుతున్నకొద్దీ ఒత్తిడికి గురవుతున్నాడు. ఈ ఒత్తిడి నుంచి ఉపశమనం పొందడానికి, రిలాక్స్ కోసం స్పా సెంటర్లను ఆశ్రయిస్తున్నాడు. దీంతో స్పా సెంటర్లకు డిమాండ్ పెరిగింది. ఈ రంగంలో శిక్షణ పొందితే ఉపాధి లభిస్తుంది. అవసరమైతే సొంతంగా స్పా సెంటర్‌ను ఏర్పాటు చేసుకోవచ్చు.
-ఈ స్పా సెంటర్లు రోజురోజుకు పెరుగుతున్నాయి. కాబట్టి స్పా మేనేజ్‌మెంట్ చేసినవారికి త్వరగా ఉపాధి లభిస్తుంది. హైదరాబాద్ వంటి పెద్ద నగరాలతోపాటు పెద్దపెద్ద పట్టణాల్లో కూడా ఈ స్పా సెంటర్లు పెరుగుతున్నాయి. కాబట్టి ఈ కోర్సు చేసినవారు స్పా సెంటర్లలో మసాజర్ లేదా థెరపిస్ట్‌గా ఉపాధి పొందవచ్చు. వేతనం కూడా ఆకర్షణీయంగా ఉంటుంది.
కోర్సులు
-స్పా మేనేజ్‌మెంట్ సర్టిఫికెట్
-స్పా అండ్ హాస్పిటాలిటీ మేనేజ్‌మెంట్
-స్పా మేనేజ్‌మెంట్ బీఏ (ఆనర్స్)
సంస్థలు
-ఓరియంట్ స్పా అకాడమీ (జైపూర్)
-ఇంటర్నేషనల్ స్పా అకాడమీ (కేరళ)
-స్పా కన్సల్టెంట్ (పుణె)
-ఇవేకాకుండా హైదరాబాద్‌లోని వివిధ స్పా సెంటర్లు శిక్షణతో పాటు ఉపాధిని ఇస్తున్నాయి.
బ్యూటీషియన్
-అందాన్ని ద్విగుణీకృతం చేసేవి బ్యూటీపార్లర్లు. ఏ సందుగొందుల్లో చూసినా ఈ బ్యూటీపార్లర్లు వెలుస్తున్నాయి. బ్యూటీషియన్ కోర్సు చేసినవారికి ఉపాధి త్వరగా లభిస్తుంది.
-యువతులు, మహిళలు మేకప్ లేకుండా ఏ ఫంక్షన్‌కు వెళ్లరంటే అతిశయోక్తిలేదు. ఫంక్షన్ అంటే ముందు బ్యూటీపార్లర్‌కు వెళ్లి మేకప్ కావాల్సిందే.
-టెన్త్ పాస్ లేదా ఫెయిలైనవారు లేదా పై చదువులు చదువలేని యువతులు బ్యూటిషియన్ కోర్సులో చేరవచ్చు. వివిధ బ్యూటీపార్లర్లు ఆసక్తిగల యువతులకు శిక్షణనిస్తున్నాయి. అంతేకాకుండా పోచంపల్లి వద్ద ఉన్న జలాల్‌పూర్‌లోని స్వామి రామానందతీర్థ ఇన్‌స్టిట్యూట్ ఉచితంగా ఈ కోర్సును అందిస్తుంది.
-బ్యూటీషియన్‌గా శిక్షణ పొందిన తర్వాత పేరొందిన బ్యూటీపార్లర్‌లో ఉపాధి లభిస్తుంది. లేదంటే సొంతంగా చిన్న బ్యూటిపార్లర్‌ను ఏర్పాటు చేసుకోవచ్చు.
కోర్సులు
-డిప్లొమా ఇన్ హెయిర్ డిజైనింగ్
-డిప్లొమా ఇన్ కాస్మెటిక్స్
-డిప్లొమా ఇన్ ఎలక్ట్రో లాగ్
-డిప్లొమా ఇన్ హెయిర్ ైస్టెలింగ్ అండ్ హెయిర్ కలరింగ్
-సిడెస్కో డిప్లొమా ఇన్ బ్యూటీ థెరపీ
సంస్థలు
-బుటిక్ ఇన్‌స్టిట్యూట్ ఆఫ్ బ్యూటీ థెరపీ అండ్ హెయిర్ డ్రెస్సింగ్ (ముంబై)
-క్రిస్టినీ వాల్మి ఇంటర్నేషనల్ స్కూల్ ఆఫ్ ఈస్థటిక్స్ (ముంబై)
-ఎన్‌రిచ్ సెలూన్ అండ్ అకాడమీ (ముంబై)
-ఎల్‌టీఏ స్కూల్ ఆఫ్ బ్యూటీ (ముంబై)
-ఇవేకాకుండా హైదరాబాద్‌లోని పేరున్న బ్యూటీపార్లర్లు, ప్రైవేట్ సంస్థలు బ్యూటీషియన్‌లో శిక్షణనిస్తున్నాయి.
ఫుడ్ కెమిస్ట్
-ఆహారం గురించి, వాటిలో మానవుడికి అవసరమైన, శక్తినిచ్చే రసాయనాల గురించి తెలుసుకునేవారే ఫుడ్ కెమిస్ట్‌లు. ఆహారం గురించి తెలుసుకోవాలనే ఆసక్తి ఉన్నవారు ఈ కోర్సును తీసుకోవచ్చు. సైన్స్ సబ్జెక్టులతో ఇంటర్ పాసైనవారు ఈ కోర్సు చేయవచ్చు.
-నేటి మారుతున్న కాలంలో ఆరోగ్యం గురించి ప్రతిఒక్కరూ శ్రద్ధతీసుకుంటున్నారు. ఈ తరుణంలో ఆరోగ్యాన్నిచ్చే ఉత్పత్తులను ప్రతి ఒక్క కంపెనీ తయారుచేయడానికి ముందుకు వస్తున్నాయి. ఉత్పత్తుల్లో మానవుల ఆరోగ్యాన్ని పెంచే రసాయనాలు ఏం వాడాలి, ఆరోగ్యాన్ని దెబ్బతీసే రసాయనాలు ఏం ఉన్నాయి అనే విషయాలను తెలుసుకోవాలంటే కెమిస్ట్‌ల అవసరం తప్పనిసరి.
-కాబట్టి ఫుడ్ కెమిస్ట్రీ కోర్సులు చేసినవారికి పలు కంపెనీల్లో విరివిగా అవకాశాలు ఉంటాయి. అంతేకాకుండా కార్పొరేట్ ఆస్పత్రులు కూడా ఎటువంటి ఆహారం తీసుకోవాలి, దేనిలో శక్తినిచ్చే విటమిన్లు తదితరాలు ఉన్నాయో రోగులకు తెలిపేందుకు ఫుడ్ కెమిస్ట్‌లను నియమించుకుంటున్నాయి.
కోర్సులు
-బీఎస్సీ ఇన్ ఫుడ్ కెమిస్ట్రీ
-ఎమ్మెస్సీ ఇన్ ఫుడ్ కెమిస్ట్రీ
-ఎమ్మెస్సీ బయోకెమిస్ట్రీ
సంస్థలు
-దనపకియం క్రిష్ణసామి ముదలియార్ కాలేజ్ ఆఫ్ ఉమెన్ (తమిళనాడు)
-లయోలా కాలేజీ (తమిళనాడు)
-మార్ అథనసియోస్ కాలేజ్ ఫర్ అడ్వాన్స్‌డ్ స్టడీస్ (కేరళ)
ఈవెంట్ మేనేజ్‌మెంట్
-ఏదైనా కార్యక్రమాన్ని చేపట్టడాన్ని ఈవెంట్ అంటారు. దానికవసరమైనవాటిని బాధ్యతగా నిర్వహించడాన్ని మేనేజ్‌మెంట్ అంటారు. దానినే స్థూలంగా ఈవెంట్ మేనేజ్‌మెంట్ అంటారు. ఈవెంట్ మేనేజ్‌మెంట్ అనేది ప్రస్తుతం ఒక అవసరంగా మారింది.
-పుట్టినరోజు నుంచి పెండ్లి వేడుకవరకు, చిన్న సమావేశాల నుంచి పెద్ద సదస్సుల వరకు వేదికలను ఏర్పాటు చేసి ఆకట్టుకోవడమనేది చాలా పెద్ద తతంగం. ఈ తతంగం నిర్వహించాలంటే బంధువులు, స్నేహితులు, కార్యకర్తలు, ప్రజలు, సభికుల మంచిచెడ్డలు చూసుకోవాలన్నా, వచ్చినవారిని ఆకర్షించేలా వేదికలను తీర్చిదిద్దాలన్నా పెద్దపని. అందుకే ఈ పనిని ఈవెంట్ మేనేజర్లకు అప్పగిస్తున్నారు. ఈవెంట్ మేనేజర్లకు ప్రస్తుతకాలంలో బాగా డిమాండ్ ఉంది. కాబట్టి ఈ కోర్సు చేసినవారికి ఆకర్షణీయ వేతనంతో ఉపాధి లభిస్తుంది.
కోర్సులు
-డిప్లొమా కోర్స్ ఇన్ ఈవెంట్ మేనేజ్‌మెంట్ (డీఈఎం)
-పోస్ట్‌గ్రాడ్యుయేట్ డిప్లొమా కోర్స్ ఇన్ ఈవెంట్ మేనేజ్‌మెంట్ (పీజీడీఈఎం)
-పోస్ట్‌గ్రాడ్యుయేట్ డిప్లొమా కోర్స్ ఇన్ ఈవెంట్ మేనేజ్‌మెంట్ అండ్ యాక్టివేషన్
-బీబీఏ ఇన్ ఈవెంట్ మేనేజ్‌మెంట్
-ఎంబీఏ ఇన్ ఈవెంట్ మేనేజ్‌మెంట్
సంస్థలు
-ఈవెంట్ మేనేజ్‌మెంట్ డిప్లొమా ఇన్‌స్టిట్యూట్ (ముంబై)
-అమైటీ యూనివర్సిటీ ఆఫ్ ఈవెంట్ మేనేజ్‌మెంట్ (న్యూఢిల్లీ)
-నేషనల్ ఇన్‌స్టిట్యూట్ ఆఫ్ ఈవెంట్ మేనేజ్‌మెంట్ (ముంబై, కోల్‌కతా, అహ్మదాబాద్)
-ది ఇంటర్నేషనల్ సెంటర్ ఫర్ ఈవెంట్ మార్కెటింగ్ మేనేజ్‌మెంట్ (ఐసీఈఎం) (న్యూఢిల్లీ)
-ఇన్‌స్టిట్యూట్ ఫర్ టూరిజమ్ ఫ్యూచర్ మేనేజ్‌మెంట్ ట్రెండ్స్ (ఐటీఎఫ్‌టీ) (చండీగఢ్)
-ఇవేకాకుండా హైదరాబాద్‌లోని పలు ఈవెంట్ మేనేజ్‌మెంట్ సంస్థలు కూడా ఔత్సాహిక అభ్యర్థులకు శిక్షణనిస్తున్నాయి.
