యూపీఎస్సీలో వన్టైమ్ రిజిస్ట్రేషన్
ఉద్యోగార్థుల కోసం యూనియన్ పబ్లిక్ సర్వీస్ కమిషన్ (యూపీఎస్సీ) ఎట్టకేలకు వన్టైమ్ రిజిస్ట్రేషన్ (ఓటీఆర్)ను ప్రారంభించింది. భవిష్యత్తులో యూపీఎస్సీ నిర్వహించబోయే పరీక్షలకు దరఖాస్తు చేసుకోవాలనుకొనే వారు ఈ ఓటీఆర్ ప్లాట్ఫాంపై రిజిస్టర్ చేసుకోవాలని సీనియర్ అధికారి ఒకరు సూచించారు. తద్వారా అభ్యర్థులు వివిధ రిక్రూట్మెంట్ పరీక్షలకు దరఖాస్తు చేసుకునే సమయంలో ప్రతిసారీ తమ వివరాలను పొందుపరచాల్సిన అవసరం ఉండదని పేర్కొన్నారు. ఈ ఓటీఆర్ ద్వారా అభ్యర్థులకు ఎంతో సమయం కలిసొస్తుందని, దరఖాస్తు ప్రక్రియ సులభమవుతుందని ఆ అధికారి తెలిపారు. తప్పులు దొర్లే అవకాశం కూడా ఉండదని పేర్కొన్నారు. ఓటీఆర్ కల నెరవేరిందని, అభ్యర్థుల వివరాలు కమిషన్ సర్వర్లో భద్రంగా ఉంటాయని వివరించారు.
