కాకతీయ రాజుల కాలంలోని ఆయా దేవస్థానాల స్థపతుల, శిల్పుల చరిత్ర కూడా అక్కడే ఉంది. త్రికూటాలయాలు, త్రిలింగేశ్వరాలయాలు, పంచ లింగేశ్వరాలయ కట్టడం, నమూనాలు, అక్కడ భద్రపర్చి ఉన్నాయి. నిజాం కాలంలోని ఎంతో విలువైన శిల్ప సంపద నేడు లండన్ మ్యూజియంలో ఉంది. ఏకఛత్రాధిపత్యంగా ఏలిన కాకతీయుల, కళ్యాణి చాళుక్య రాజుల సంపద ఇప్పుడు మనకు కొంత మాత్రమే లభ్యమవుతుంది.

రెండో అహవమల్ల రాజు కాలంలోని ఆనాటి విదర్భ (నేటి బీదర్) ప్రాంత, సాంఘిక-చారిత్రక సాహిత్యం యావత్తూ అక్కడే ఉంది. ఎంతో విలువైన తాళపత్ర గ్రంథాలు, ఆయుర్వేద గ్రంథాలను సైతం విదేశీయులు దోచుకెళ్లారు. వాళ్లు తీసుకెళ్లిన తెలంగాణ సంపద చాలా విలువైనది. అరుదైన, విలువైన ఎన్నో గ్రంథాలు రాత ప్రతులు, చరిత్ర, సాహిత్యం, వేదం, ఆయుర్వేదం, దేవస్థానాల, స్థపతుల చరిత్ర మొదలైనవి ఎన్నో వాటిలో ఉన్నాయి. తెలంగాణ చిత్రకళలో చెప్పుకోదగ్గ మహాచిత్రకారుడు సిద్దిపేట కాపు రాజయ్య. ఆయన గీసిన కొన్ని చిత్రాలు లండన్ మ్యూజియంలో ఉన్నట్టు చరిత్ర చెపుతుంది.

లకా్ష్మగౌడ్, ఎక్కా మొదలైనవారి అపురూప వర్ణ చిత్రాలు, అంతేకాకుండా భాగ్యనగర్, మౌలాలి, చార్మినార్ చిత్రాలు కూడా విదేశీ మ్యూజియాల్లో ఉన్నాయి. శివంపేట, శాస్ర్తుల వంశీకుల పూర్వం లభించిన గ్రంథాలు సైతం నేడు విదేశీయుల పాలనలో ఉన్నాయి. నేడు మనకు పూర్తిగా లభ్యంకాని ఝరాసంగం, అనంతగిరి, వరదరాజుస్వామి దేవస్థానం, వేములవాడ ప్రాచీన దేవాలయ ప్రాంత చరిత్ర అమోఘంగా ఉంది. కానీ అవన్నీ విదేశాలకు తరలిపోయాయి. నిజాం ప్రభువు లండన్‌కు తరలించిన సంపదలో విలువైన వజ్రాలు, రాళ్లు ఉన్నాయి. వాటిలో ఎంతో విలువైన జాకబ్ డైమండ్ కూడా ఉంది. ప్రాచీన తాళపత్ర గ్రంథాల్లోని ఆయుర్వేదాన్ని జర్మనీ శాస్త్రవేత్తలు కూడా తస్కరించారు. వాటిలో మంథెన బ్రాహ్మణ సర్వస్వం, శ్లోకపద్య తాళపత్ర గ్రంథాలు చెప్పుకోదగ్గవి. అసలైన మాధవీయ భాష్యంను కూడా మాక్స్‌ముల్లర్ తీసుకెళ్లినట్టు తెలుస్తుంది.

ప్రాచీన మెదక్ కోట వద్ద బ్రాహ్మణ వీధిలో ఒక సంస్కృత పండితుడి ఇంట్లో లభ్యమైన ప్రాచీన ఆయుర్వేద గ్రంథం (11వందల పేజీలు) ఇప్పటికీ జర్మనీ మ్యూజియంలో భద్రంగా ఉంది. చరిత్రకు సంబంధించిన ఎన్నో విలువైనవి, ప్రాచీనమైనవి ఇప్పటికీ ఉన్నాయి. చరిత్రపరంగా తెలంగాణ కు చెందిన 8000 గ్రంథాలు విదేశాల్లో ఉన్నట్టుగా చరిత్ర పరిశోధకులు చెపుతున్నారు.

ప్రాచీన ఇందూరు (నేటి నిజామాబాద్ జిల్లా), వర్ని, కౌలాస్‌లో లభ్యమైన కొంత ప్రాచీన సంపద కూడా పారిస్ కింగ్స్ లైబ్రరీలో ఉంది. డాక్టర్ ఎన్. గోపి విదేశాల్లో మన సంపద అని తన వ్యాస నవమిలో చెప్పారు. అయితే దాంట్లో తెలంగాణ ప్రాచీన సంపద, శాసన కవుల చరిత్రను తెలియజేయలేదు. నేడు అమెరికాలోని పుల్‌టన్ లైబ్రరీలో కూడా కొంత సమాచారం లభ్యమవుతుంది.