General Studies | ఉన్నత విద్య.. దేశ ఆర్థికాభివృద్ధికి ఊతం

ఉన్నత విద్యపై అఖిల భారత సర్వే- 2020-21

ఒక దేశం పారిశ్రామికంగా, సామాజికంగా, ఆర్థికంగా అభివృద్ధి సాధించడానికి ఆ దేశ ఉన్నత విద్యా వ్యవస్థ ముఖ్యమైన పాత్ర పోషిస్తుంది. భారతీయ ఉన్నత విద్యా వ్యవస్థ అమెరికా, చైనా తర్వాత ప్రపంచంలోనే మూడో అతిపెద్దదిగా గుర్తింపు పొందింది. అలాంటి ఉన్నత విద్యపై కేంద్ర విద్యా మంత్రిత్వ శాఖ 2011 నుంచి అఖిల భారత సర్వే నిర్వహిస్తుంది. ఈ నివేదికలో 2010-11 సంవత్సరానికి సంబంధించిన గణాంకాలను విద్యా మంత్రిత్వ శాఖ మొదటిసారి విడుదల చేసింది. ప్రస్తుతం విడుదల చేసిన నివేదికలో 2020-21కి సంబంధించి భారత భూభాగంలోని అన్ని ఉన్నత విద్యాసంస్థలను కవర్‌ చేస్తూ దేశంలో ఉన్నత విద్యకు సంబంధించిన గణాంకాలను విడుదల చేసింది.

• 2019-20తో పోలిస్తే దేశవ్యాప్తంగా విద్యార్థుల నమోదు 7.5% పెరిగినట్లు 2020-21కి సంబంధించిన ఆల్‌-ఇండియా సర్వే ఆన్‌ హయ్యర్‌ ఎడ్యుకేషన్‌ (AISHE) తెలిపింది. AISHE సర్వే విద్యార్థుల నమోదు, ఉపాధ్యాయుల డేటా, మౌలిక సదుపాయాల సమాచారం, ఆర్థిక సమాచారం మొదలైన వివిధ అంశాలపై వివరణాత్మక సమాచారాన్ని సేకరిస్తుంది.
• ఈ సంవత్సరం విడుదల చేసిన నివేదికను మొదటిసారి దేశంలోని ఉన్నత విద్యా సంస్థలు (HEI) ఉన్నత విద్యా శాఖ, నేషనల్‌ ఇన్ఫర్మేటిక్స్‌ సెంటర్‌ (NIC) అభివృద్ధి చేసిన వెబ్‌ డేటా క్యాప్చర్‌ ఫార్మాట్‌ (వెబ్‌ DCF) ఆధారంగా పూర్తిగా ఆన్‌లైన్‌ డేటా సేకరణ ప్లాట్‌ఫామ్‌ను ఉపయోగించి సిద్ధం చేశారు. ఈ సంవత్సరం విడుదల చేసిన నివేదికలోని ముఖ్య అంశాలను, గణాంకాలను పరిశీలిస్తే..
  సంస్థల సంఖ్య
• 2020-21లో విశ్వవిద్యాలయాల సంఖ్య గతంతో పోలిస్తే 70కి పెరిగింది. 2019-20లో దేశంలో 1,043 ఉంటే 2020-21 నాటికి ఈ సంఖ్య 1,113కి పెరిగింది.
• ఉత్తరప్రదేశ్‌, మహారాష్ట్ర, కర్ణాటక, రాజస్థాన్‌, తమిళనాడు, మధ్యప్రదేశ్‌, ఆంధ్రప్రదేశ్‌, గుజరాత్‌, తెలంగాణ, కేరళ కళాశాలలు సంఖ్యా పరంగా మొదటి స్థానంలో ఉన్న 10 రాష్ర్టాలు.
• జిల్లాల పరంగా చూస్తే గరిష్ట సంఖ్యలో బెంగళూరు అర్బన్‌లో కళాశాలలు (1058) ఉన్నాయి. తర్వాత జైపూర్‌ (671). దాదాపు 32% కళాశాలలు దేశంలోని 50 జిల్లాల్లో ఉన్నాయి.
  మొత్తం నమోదు
• ఇది 2019-20లో 3.85 కోట్ల నుంచి 2020-21లో దాదాపు 4.13 కోట్లకు పెరిగింది (28.80 లక్షల పెరుగుదల). మహిళల నమోదు 2019-20లో 18.8 మిలియన్ల నుంచి 2020-21లో 20.1 మిలియన్లకు పెరిగింది. ఇక షెడ్యూల్డ్‌ కులాల నమోదును పరిశీలిస్తే మునుపటి సంవత్సరంతో పోలిస్తే 2020-21లో నమోదు చేసుకున్న SC విద్యార్థులు 2 లక్షల మంది. ఈ నివేదిక ప్రకారం నివేదిక సంవత్సరంలో కూడా దాదాపు 3 లక్షల మంది ST విద్యార్థులు, 6 లక్షల మంది OBC విద్యార్థులు ఉన్నత విద్య కోసం నమోదు చేసుకున్నారు.
• సర్వే నివేదిక ప్రకారం, అండర్‌ గ్రాడ్యుయేట్‌ స్థాయిలో, హ్యుమానిటీస్‌ (దాదాపు 33%), సైన్స్‌ (దాదాపు 15%), వాణిజ్యం, ఇంజినీరింగ్‌ & టెక్నాలజీలో నమోదు అత్యధికంగా ఉంది. పోస్ట్‌ గ్రాడ్యుయేట్‌ స్థాయిలో, అత్యధిక సంఖ్యలో విద్యార్థులు సైన్స్‌ తర్వాత సాంఘిక శాస్ర్తాన్ని ఎంచుకున్నారు.
  స్త్రీ నమోదు
• 2019-20లో 1.88 కోట్ల నుంచి ప్రస్తుత నివేదిక సమయానికి 2.01 కోట్లకు పెరిగింది. ఇది 2014-15 నుంచి దాదాపు 44 లక్షలు (28%) పెరుగుదలగా ఉంది. మొత్తం విద్యా నమోదులో మహిళల నమోదు శాతం 2014-15లో 45% నుంచి 2020-21లో దాదాపు 49%కి పెరిగింది.
  టీచింగ్‌, నాన్‌ టీచింగ్‌ స్టాఫ్‌
• 2019-20 కంటే 2020-21లో ఉపాధ్యాయుల సంఖ్య 47,914కు పెరిగింది. 100 మంది పురుష ఉపాధ్యాయులకు 75 మంది మహిళా ఉపాధ్యాయులు ఉన్నారు.
  మౌలిక సదుపాయాలు
• 2020-21లో ఉన్నత విద్యా సంస్థల్లో వివిధ మౌలిక సదుపాయాల లభ్యత ఈ విధంగా ఉంది.
• లైబ్రరీలు (97%)
• ప్రయోగశాలలు (88)
• కంప్యూటర్‌ కేంద్రాలు (91%, 2019-20లో ఇది 86%)
• నైపుణ్యాభివృద్ధి కేంద్రం ( 61%, 2019-20లో ఇది 58%)
• నేషనల్‌ నాలెడ్జ్‌ నెట్‌వర్క్‌కి కనెక్టివిటీ (56%, 2019-20లో ఇది 34%)
  దూర విద్య
• దూర విద్యలో నమోదు 45.71 లక్షలు (20.9 లక్షల మంది స్త్రీలు), 2019-20 నుంచి దాదాపు 7%, 2014-15 నుంచి 20% పెరుగుదల.
  కోర్సులు
• అండర్‌ గ్రాడ్యుయేట్‌ స్థాయి: ఇందులో అత్యధిక నమోదు ఆర్ట్స్‌ స్ట్రీమ్‌లో ఉంది. తర్వాత సైన్స్‌, ఇంజినీరింగ్‌లో నమోదయింది.
• పోస్ట్‌ గ్రాడ్యుయేట్‌ స్థాయి: ఈ స్థాయిలో, సామాజిక శాస్త్రంలో అత్యధిక సంఖ్యలో నమోదు జరిగింది.
• పీహెచ్‌డీ స్థాయి: ఇంజినీరింగ్‌, టెక్నాలజీ రంగం ప్రజాదరణ పొందిన కోర్సుగా నమోదైంది. తర్వాత స్థానంలో సైన్స్‌ ఉంది.
  దేశంలో ఉన్నత విద్యా వ్యవస్థకు ఎదురవుతున్న సవాళ్లు
• సదుపాయాలు, సౌకర్యాల కొరత: దేశంలో అత్యంత గుర్తింపు పొందిన ఉన్నత విద్యా సంస్థలు కాకుండా చాలా కళాశాలలు, విశ్వవిద్యాలయాలు ప్రాథమిక, ఉన్నత స్థాయి పరిశోధనా సౌకర్యాలను కలిగి లేవు. లైబ్రరీ, హాస్టళ్లు, రవాణా, క్రీడా సౌకర్యం మొదలైన సరైన మౌలిక సదుపాయాలు, ప్రాథమిక సౌకర్యాలు లేకుండా చాలా విద్యా సంస్థలు నేటికీ నడుస్తున్నాయి.
• ఉపాధ్యాయుల కొరత: రాష్ట్ర, కేంద్ర విశ్వవిద్యాలయాల్లో 30% కంటే ఎక్కువ అధ్యాపక ఉద్యోగాలు ఖాళీగా ఉన్నాయి.
  పాఠ్యప్రణాళిక నాణ్యత ప్రమాణాలు తక్కువగా ఉండటం: భారతీయ ఉన్నత విద్య పాఠ్యాంశాల్లో నాణ్యత లేమి సమస్యను ఎదుర్కొంటుంది. చాలా ఉన్నత విద్యా సంస్థల్లో పాఠ్యాంశాలు కాలం చెల్లినవి, అసంబద్ధమైనవి ఉన్నాయి.
  స్వయంప్రతిపత్తి: ప్రమాణాలు, అపాయింట్‌మెంట్‌లు, ఫీజుల నిర్మాణం, పాఠ్యాంశాలపై నిర్ణయం తీసుకునే UGC, MCI వంటి నియంత్రణ సంస్థల అధిక నియంత్రణ కొత్త సంస్థలను క్యాంపస్‌లను తెరవకుండా నిరోధించింది.
  దేశంలో ఉన్నత విద్యా వ్యవస్థను మెరుగుపరచడానికి తీసుకోవాల్సిన చర్యలు
  ఖాళీలను భర్తీ చేయడం: సంస్థలకు మరింత స్వయంప్రతిపత్తి కల్పించడం ద్వారా ప్రభుత్వం ఖాళీలను భర్తీ చేసేలా చూడాలి.
  శాశ్వత నియామకాలు: దేశం విశ్వవిద్యాలయాలను ప్రపంచ స్థాయి సంస్థలుగా మార్చాలనుకుంటున్నందున, శాశ్వత నియామకాలను సమయానుకూలంగా, పారదర్శకంగా వేగవంతం చేయడం ద్వారా యువ పరిశోధకులు, వేలాది మంది తాత్కాలిక అధ్యాపకుల ప్రయోజనాలను కాపాడాలి.
  నూతన చొరవలను అమలు చేయడం: హ్యాకథాన్‌, పాఠ్యాంశాల సంస్కరణ, ఎప్పుడైనా, ఎక్కడైనా స్వయంగా నేర్చుకోవడం, ఉపాధ్యాయ శిక్షణ వంటి కొత్త కార్యక్రమాలు నాణ్యతను మెరుగుపరచడం లక్ష్యంగా ఉన్నాయి. వీటిని సమర్థవంతంగా అమలు చేయాలి.
  ప్రోత్సాహకం: తప్పనిసరిగా సంస్థాగతీకరించవలసిన ప్రాథమిక మార్పుల్లో ఒకటి అధ్యాపక సభ్యుల కోసం సమూలంగా మార్పులను తీసుకురావాలి.
  పెట్టుబడి: ఉన్నత విద్యా రంగంలో తగిన పెట్టుబడి అవసరం. పెట్టుబడిలో ఏర్పడిన ఖాళీని ప్రైవేట్‌ రంగం ద్వారా భర్తీ చేయాలి.

పాఠ్యాంశాలను పునరుద్ధరించడం

• నైపుణ్యాభివృద్ధిపై పాఠ్యాంశాలను పరిశ్రమ-ఆధారితంగా, నవీకరించిన, ఆచరణాత్మకంగా దృష్టి కేంద్రీకరించడం ముఖ్యం. గుర్తుంచుకోవడం, రాయడం నైపుణ్యాల కంటే విమర్శనాత్మక ఆలోచన, విశ్లేషణాత్మక తార్కికం, సమస్య పరిష్కారంపై ఎక్కువ దృష్టి పెట్టడం అవసరం. అనుకున్న లక్ష్యాలను కొనసాగించడానికి విశ్వవిద్యాలయాల అనుకూలతను నిర్ణయించడానికి ఒక క్రమబద్ధమైన, పొందికైన, పారదర్శక విధానం అవసరం.
• పైన పేర్కొన్న విధంగా ఉన్నత విద్య అనేక సవాళ్లను ఎదుర్కొంటుంది. చాలా సవాళ్లు కష్టమైనవే కానీ పరిష్కరించడం అసాధ్యం కానివి కాదు. ప్రపంచ శక్తిగా ఉండాలనే లక్ష్యంలో భాగంగా ఉన్నత విద్యను పరిష్కరించడం, పునర్నిర్మించడం తప్పనిసరి. అప్పుడు మాత్రమే మనం దేశ మానవ సామర్థ్యాన్ని, వనరులను పూర్తి స్థాయిలో వినియోగించుకోగలుగుతాం, యువత ఎదుగుదలకు ఉపయోగించగలుగుతాం. ఒక దేశానికి ముఖ్యమైన ఆస్తి విద్యార్థులు, వారి భవిష్యత్తు దేశ భవిష్యత్తు. కాబట్టి ప్రాథమిక విద్య, నైపుణ్యాలను అందించడానికి ప్రభుత్వం విద్యావ్యవస్థను బలోపేతం చేయాలి.

మల్లవరపు బాలలత
సివిల్స్‌ ఫ్యాకల్టీ
సీఎస్‌బీ ఐఏఎస్‌ అకాడమీ,
హైదరాబాద్‌