April 05 Current Affairs | అంతర్జాతీయం
ఐఎన్ఎస్ సుమేధ
భారత నౌకాదళానికి చెందిన ఐఎన్ఎస్ సుమేధ నౌక విదేశీ పర్యటన నిమిత్తం మార్చి 26న అల్జీరియాలోని పోర్ట్ అల్జీర్స్కు చేరుకుంది. అల్జీరియన్ నేవీ, అల్జీర్స్లోని భారత రాయబార కార్యాలయం అధికారులు ఈ నౌకకు స్వాగతం పలికారు. ఇరుదేశాల ద్వైపాక్షిక సంబంధాలను బలోపేతం చేయడం, నౌకాదళాల మధ్య సముద్ర సహకారం, పరస్పర చర్యలను పెంపొందించడమే ఈ పర్యటన ఉద్దేశం.
దేశద్రోహ చట్టం రద్దు
పాకిస్థాన్లోని లాహోర్ హైకోర్టు వలస పాలకుల కాలం నాటి దేశద్రోహ చట్టాన్ని మార్చి 30న కొట్టివేసింది. కేంద్ర, రాష్ట్ర ప్రభుత్వాలను విమర్శించడం నేరంగా భావించే ఈ చట్టం రాజ్యాంగం ప్రకారం అసమంజసంగా ఉందని తీర్పు చెప్పింది. ఈ మేరకు జస్టిస్ షాహిద్ కరీం దేశ ద్రోహానికి సంబంధించిన పాక్ శిక్షాస్మృతిలోని సెక్షన్ 124-ఎ ను కొట్టేశారు. దేశ ద్రోహ చట్టం స్వతంత్ర పాకిస్థాన్లో భావ ప్రకటన స్వేచ్ఛను అణచివేసే ఆయుధంగా తయారైందని ఓ పౌరుడు పిటిషన్ వేయడంతో కోర్టు విచారణ జరిపి ఈ నిర్ణయం వెలువరించింది.
జీరో వేస్ట్స్ డే
ఏటా మార్చి 30న ఇంటర్నేషనల్ డే ఆఫ్ జీరో వేస్ట్స్గా నిర్వహిస్తున్నారు. వ్యర్థాలను తగ్గించడం, స్థిరమైన వినియోగం, ఉత్పత్తి విధానాలను ప్రోత్సహించడానికి ఈ డేని జరుపుకొంటున్నారు. మార్చి 30న ఇంటర్నేషనల్ డే ఆఫ్ జీరో వేస్ట్ను నిర్వహించాలని ఐక్యరాజ్యసమితి జనరల్ అసెంబ్లీ 2022, డిసెంబర్ 14న తీర్మానించింది. ఈ ఏడాది దీని థీమ్ ‘అచీవింగ్ సస్టెయినబుల్ అండ్ ఎన్విరాన్మెంటల్లీ సౌండ్ ప్రాక్టీసెస్ ఆఫ్ మినిమైజింగ్ అండ్ మేనేజింగ్ వేస్ట్’.
