వెబ్‌సైట్‌లో ఎస్సై ప్రిలిమ్స్ హాల్‌టికెట్లు
యూనిఫాం ఉద్యోగాల భర్తీలో భాగంగా ఆగస్టు 7న ఎస్సై అభ్యర్థులకు ప్రాథమిక రాత పరీక్ష నిర్వహించనున్నట్టు తెలంగాణ రాష్ట్ర స్థాయి పోలీస్ నియామక మండలి (టీఎస్ఎల్పీఆర్బీ) చైర్మన్‌ వీవీ శ్రీనివాసరావు శుక్రవారం ఒక ప్రకటనలో తెలిపారు. అభ్యర్థులు తమ హాల్‌టికెట్లను ఈ నెల 30 నుంచి ఆగస్టు 5 వరకు www.tslprb.in నుంచి డౌన్‌లోడ్‌ చేసుకోవాలని కోరారు. ఉదయం 10 గంటల నుంచి మధ్యాహ్నం ఒంటిగంట వరకు ప్రిలిమ్స్ నిర్వహిస్తామన్నారు. మొత్తం 554 పోస్టులకు 2,47,217 మంది అభ్యర్థులు దరఖాస్తు చేసుకొన్నారని పేర్కొన్నారు. రాష్ట్రవ్యాప్తంగా 503 పరీక్ష కేంద్రాలను ఏర్పాటు చేశామన్నారు. హాల్‌టికెట్ల డౌన్‌లోడ్‌లో సందేహాలుంటే 9393711110 లేదా 9391005006ను సంప్రదించాలని కోరారు.
