ఆర్ట్స్ కాలేజీలో బీఏ ఆనర్స్ సోషియాలజీ కోర్సు
-దక్షిణ భారతదేశంలోనే మొదటిసారి
– కాకతీయ యూనివర్సిటీ వీసీ ప్రొఫెసర్‌ రమేశ్‌
హనుమకొండ సుబేదారిలోని ఆర్ట్స్ అండ్‌ సైన్స్ కళాశాలలో ఈ విద్యాసంవత్సరం నుంచి బీఏ ఆనర్స్ సోషియాలజీ కోర్సును ప్రారంభిస్తున్నట్టు కాకతీయ విశ్వవిద్యాలయం వీసీ ప్రొఫెసర్‌ టీ రమేశ్‌ వెల్లడించారు. దక్షిణ భారతదేశంలోనే తొలిసారిగా ఈ కోర్సును ప్రారంభిస్తున్నామని, ఇది భవిష్యత్తులో ఉపాధి కల్పన కోర్సుగా దోహదపడుతుందని చెప్పారు. ఈ కోర్సు ద్వారా ఫండమెంటల్స్ ఆఫ్‌ సోషియాలజీ, తత్వశాస్త్రం, సమాజ పరిణామక్రమం, జర్నలిజం, రాజకీయ, ఆర్థిక, చరిత్ర, సామాజిక విషయాలను అధ్యయనం చేయవచ్చని తెలిపారు. బ్రిటిష్‌ కాలంలో ఈ కోర్సు దేశంలో ప్రవేశపెట్టారని గుర్తుచేశారు. ఈ కోర్సులో చేరేందుకు దోస్త్ ద్వారా దరఖాస్తు చేసుకోవాలని కళాశాల ప్రిన్సిపాల్‌ ఆచార్య బన్న అయిలయ్య తెలిపారు.
