Last step to success | ఎస్‌ఐ మెయిన్స్ విజయానికి చివరి మెట్టు

ఎస్‌ఐ ఉద్యోగ సాధనలో మొదటి అంకమైన ప్రిలిమినరీ పరీక్ష ముగిసిన త‌ర్వాత‌ మిగిలిన రెండు దశల్లో మొదటిది ఫిజికల్ ఎఫిషియన్సీ టెస్ట్ (పీఈటీ), చివరిది మెయిన్స్. ఎస్‌ఐ ఉద్యోగార్థులకు ఈ రెండు విభాగాలు ఎంతో ముఖ్యమైనవి. ఈ నేపథ్యంలో అభ్యర్థులు ప్రిపరేషన్ సందర్భంగా పాటించాల్సిన మెళకువలు…
-ఫిజికల్ టెస్టులో విజయం సాధించడం ఎస్‌ఐ ఉద్యోగ సాధనలో చాలా కీలకం. ముఖ్యంగా 800 మీటర్ల పరుగును 170 సెకండ్లలో, 100 మీటర్ల పరుగును 15 సెకండ్లలో పూర్తిచేయాలి. గత నోటిఫికేషన్లను పరిశీలిస్తే ఈ రెండు ఈవెంట్లలో ఎక్కువ మంది విఫలమయ్యారు.
-అభ్యర్థులు లాంగ్ జంప్, హైజంప్‌తోపాటు 800 మీటర్ల పరుగుపైన ఎక్కువగా దృష్టి సారించి సాధన చేయడం ద్వారా విజయం సాధించవచ్చు.
-చాలా మంది అభ్యర్థులు ప్రిలిమినరీ పరీక్ష రాసి వెంటనే మెయిన్స్ ప్రిపరేషన్ ప్రాంభించకుండా సమయం వృథా చేస్తుంటారు. ఇది సరైన పద్ధతికాదు.
-అభ్యర్థులు వారివారి కేటగిరీల్లో ఉత్తీర్ణత మార్కులు సాధించారా? లేదా? అనేది పీఆర్‌బీ కీని చూసి నిర్ధారించుకోవాలి. పీఆర్‌బీ ప్రకటించిన కీలో కొన్ని తప్పులు ఉన్నాయి. వీటిని ఫైనల్ కీలో సరిచేస్తారు. కాబట్టి కీ తప్పుల గురించి ఆలోచించకుండా ప్రిపరేషన్ ప్రారంభించండి.
-అభ్యర్థులు మెయిన్స్‌లో విజయం సాధించాలంటే ముందుగా ప్రిలిమినరీ పరీక్షలో ఎన్ని మార్కులు వచ్చాయి? ఏయే సబ్జెక్టులో తక్కువ మార్కులు వచ్చాయో గుర్తించి ఆయా సబ్జెక్టుల్లో ఎక్కువ మార్కులు సాధించే దిశగా ప్రిపరేషన్ విధానాన్ని మార్చుకోవాలి.

 గమనిక: పేపర్-1, పేపర్-2 కేవలం అర్హత పరీక్షలు. పేపర్ -3, పేపర్-4 లలో వచ్చిన మార్కులను మాత్రమే పరిగణలోకి తీసుకుని అభ్యర్థులకు ఉద్యోగాలు కేటాయిస్తారు.
-పేపర్-1, పేపర్-2 అర్హత పరీక్షలు అయినా నెగిటివ్ మార్కులు ఉన్నాయి. కాబట్టి జాగ్రత్తగా ప్రిపేర్ అవుతూ, ప్రాక్టీస్ పేపర్లను సాధన చేయాలి.

 

పేపర్-1 (ఇంగ్లిష్)

-గ్రామీణ ప్రాంత అభ్యర్థులు జనరల్ ఇంగ్లిష్ పేపర్‌ను కఠినంగా భావిస్తారు. దీనికి కారణం ఈసారి నెగిటివ్ మార్కుల విధానం అమలు చేయడం. 100 మార్కుల పేపర్‌ను ఎ, బి రెండు భాగాలుగా విభజించారు. పార్ట్-బి డిస్క్రిప్టివ్ పేపర్. దీనికి 75 మార్కులు. పార్ట్-ఎ ఆబ్జెక్టివ్ పేపర్. దీనికి 25 మార్కులు. పార్ట్-ఎ లో ప్రతి తప్పు సమాధానానికి 1/4 నెగెటివ్ మార్కుగా నిర్ణయించారు.
-పీఆర్‌బీ ప్రకారం ఎస్సెస్సీ స్థాయి ప్రశ్నలను, ముఖ్యంగా Precis Writing, Letter writing, Eassy topics, Reading comprehension, Vocabulary, Grammer మొదలైన టాపిక్స్ నుంచి అడుగుతారు. ఈ పేపర్‌లో ఓసీ అభ్యర్థులు 40 మార్కులు, బీసీలు 35 మార్కులు, ఎస్సీ, ఎస్టీలు 30 మార్కులు సాధిస్తే ఉత్తీర్ణులవుతారు.

 

పేపర్-2 (తెలుగు/ ఉర్దూ)

-రెండో పేపర్‌లో అభ్యర్థులు తెలుగు, ఉర్దూ భాషల్లో ఏదైనా ఒక్క భాషను ఎంచుకోవాలి.
-రెండో పేపర్‌కు కూడా మొదటి పేపర్‌లాగే మూడు గంటల సమయం ఇస్తారు. 100 మార్కులు. ఈ పేపర్లో పార్ట్-ఎకు 25 మార్కులు కేటాయించారు. ఇందులో 50 ఆబ్జెక్టివ్ తరహా ప్రశ్నలు అడుగుతారు. సమయం 45 నిమిషాలు. ప్రతి తప్పు సమాధానానికి 1/4 వంతున మార్కులు తగ్గిస్తారు. ఈ పేపర్‌లో మరో భాగం పార్ట్-బికి 75 మార్కులు కేటాయించారు. ఇది పూర్తిగా డిస్క్రిప్టివ్ తరహాలో ఉంటుంది. పరీక్ష సమయం 2:15 గంటలు.
-పేపర్-2లో ఓసీ అభ్యర్థులు 40 మార్కులు, బీసీలు 35 మార్కులు, ఎస్సీ, ఎస్టీలు 30 మార్కులు సాధిస్తే ఉత్తీర్ణులవుతారు.
-పేపర్-2 సిలబస్, పేపర్-1 సిలబస్ ఒకేవిధంగా ఉంటుంది.

 

పేపర్-3 (అర్థమెటిక్-రీజనింగ్)

-ఎస్‌ఐ ఉద్యోగ సాధనలో అతి ముఖ్యమైన పేపర్ ఇది. ఆబ్జెక్టివ్ తరహాలో 200 మార్కులకు ఉంటుంది. మూడు గంటల సమయం కేటాయించారు.
-ఇందులో అర్థమెటిక్, రీజనింగ్ రెండు భాగాల నుంచి ప్రశ్నలు అడుగుతున్నారు. ప్రధానంగా సంఖ్యావ్యవస్థ, బారువడ్డీ, చక్రవడ్డీ, నిష్పత్తి, అనుపాతం, సగటు, శాతాలు, లాభ-నష్టాలు, కాలం-దూరం, కాలం-పని, పని-వేతనాలు, గడియారాలు, క్యాలెండర్, భాగస్వామ్యం, క్షేత్రగణితం మొదలైన అంశాలు సిలబస్‌లో ఉన్నప్పటికీ.. అదనంగా క.సా.గు, గ.సా.భా మిశ్రమాలు, సూక్ష్మీకరణలు, వయస్సులపై, రేఖాగణితం, బీజగణితం మొదలైన టాపిక్స్‌పై ప్రశ్నలు వస్తున్నాయి.
-రీజనింగ్ విభాగంలో వెర్బల్, నాన్‌వెర్బల్ నుంచి ప్రశ్నలు వచ్చే అవకాశం ఉంది. ప్రధానంగా సిరీస్, అనాలజీ, పోలిక పరీక్ష, వెన్ చిత్రాలు, దిశలపై ప్రశ్నలు, రక్తసంబంధాలు, సీటింగ్ అరేంజ్‌మెంట్స్, పజిల్ పరీక్ష, కోడింగ్, డికోడింగ్, ప్రకటనలు-తీర్మానాలు, గణిత ప్రక్రియలు, పాచికలు, చిత్రాలను గణించడం, తప్పిపోయిన సంఖ్యను కనుక్కోవడం మొదలైన టాపిక్స్ నుంచి ప్రశ్నలు వస్తాయి.
-ఈ పేపర్‌లో ఎక్కువ మార్కులు సాధించాలంటే ప్రతి టాపిక్‌లోని బేసిక్స్‌ను నేర్చుకుని మాదిరి ప్రశ్నలను సాధన చేయాలి. క్రమం తప్పకుండా ప్రాక్టీస్ చేయడం ద్వారా ఫైనల్ పరీక్షలో ఎక్కువ మార్కులు సాధించవచ్చు.
-ఈ పేపర్‌లో ఎక్కువ ప్రశ్నలు సాధిస్తామని మ్యాథ్స్ విద్యార్థులు, తక్కువ మార్కులు వస్తాయని నాన్ మ్యాథ్స్ విద్యార్థులు భావించాల్సిన అవసరం లేదు. ఎవరైతే బేసిక్స్ నేర్చుకుని ఎక్కువ ప్రశ్నలను సాధన చేస్తారో వారే ఎక్కువ మార్కులు సాధించే అవకాశం ఉంది.

 

పేపర్-4 జనరల్ స్టడీస్

-ఈ పేపర్‌కు కూడా 200 మార్కులు, మూడు గంటల సమయం కేటాయించారు. ఈ పేపర్ ఆబ్జెక్టివ్ పద్ధతిలో ఉంటుంది.
ఈ పేపర్‌లో కింది అంశాల నుంచి ప్రశ్నలు వస్తాయి..
-జనరల్ సైన్స్.. అంటే జీవశాస్త్రం, భౌతికశాస్త్రం, రసాయనశాస్త్రం, శాస్త్ర-సాంకేతిక అంశాలు.
-ముఖ్యమైన జాతీయ-అంతర్జాతీయ అంశాలు
-భారతదేశ చరిత్ర (రాజకీయ, సాంఘిక, ఆర్థిక, సాంస్కృతిక అంశాలు), భారతదేశ జాతీయోద్యమ చరిత్ర.
-భారతదేశ భౌగోళిక శాస్త్రం
-ఇండియన్ పాలిటీ
-భారత ఆర్థిక వ్యవస్థ
-తెలంగాణ ఉద్యమ చరిత్ర, తెలంగాణ రాష్ట్ర ఆవిర్భావ దశలు
-పర్సనాలిటీ పరీక్ష (ఎథిక్స్, సెన్సివిటీ జెండర్, బలహీన వర్గాలు, సోషల్ అవేర్‌నెస్, ఎమోషనల్ ఇంటెలిజెన్స్)
-ఈ పేపర్‌లో ఏ సబ్జెక్టు నుంచి ఎన్ని మార్కులు వస్తాయని చెప్పలేం. గత ప్రశ్నపత్రాల ప్రకారం.. చరిత్ర (భారతదేశ, తెలంగాణ), జనరల్ సైన్స్, జాగ్రఫీ (భారతదేశ, తెలంగాణ), పాలిటీ, కరెంట్ అఫైర్స్, ఆర్థిక వ్యవస్థ మొదలైన సబ్జెక్టులను ప్రాధాన్యత ప్రకారం చదివితే ఈ పేపర్‌లో ఎక్కువ మార్కులు సాధించవచ్చు.
-పదిరోజుల క్రితం జరిగిన ప్రిలిమినరీ పరీక్ష, గత ప్రశ్నపత్రాలను పరిశీలిస్తే రోజురోజుకు జనరల్ స్టడీస్ ప్రశ్నపత్రాల కఠినస్థాయి పెరుగుతున్నది. ఈ ప్రశ్నలు గ్రూప్-1, గ్రూప్-2 స్థాయిలో ఉంటున్నాయి. కాబట్టి మీరు ఎస్‌ఐ ఉద్యోగం సాధించాలంటే గ్రూప్-2లో జనరల్ స్టడీస్ చదవాలి.
-జనరల్ స్టడీస్‌లోని అన్ని సబ్జెక్టుల్లో ఎక్కువ మార్కులు సాధించాలంటే మొదట ప్రతి సబ్జెక్టును బేసిక్స్ నుంచి చదివి, ప్రశ్నలను సాధన చేయాలి. ప్రతి సబ్జెక్టుకు సంబంధించిన ప్రామాణిక పుస్తకాలను సేకరించుకుని క్రమం తప్పకుండా ప్రశ్నలను సాధన చేయాలి.